Фудбалерите на Шкендија дебитираа со пораз од 2:0 на гостувањето против Рајо Ваљекано во Мадрид во третото по квалитет европско клупско натпреварување, Конференциската лига.

Шпанците се покажаа како доста поквалитетен тим од актуелниот македонски првак во текот на мечот, целосно ја контролираа играта на теренот, а до бодовите стигнаа за само четири минути.

Тренерот на тетовските „црвено-црни“, Јетон Беќири по мечот ја честиташе победата на противникот кој смета дека може да биде во трка за титулата во ова натпреварување:

– Знаевме дека играме против еден од тимовите што играат во една од најдобрите лиги во светот. Се чувствувам лошо за првото полувреме, но сум среќен. Честитки до Рајо Ваљекано за победата. Тие играат во најдобрата лига во светот и тоа се покажа. Рајо би можел да биде еден од сериозните кандидати за освојување на ова натпреварување. Многу добри тимови ќе се мачат кога ќе дојдат да играат тука – рече Беќири.

Следниот меч Шкендија во Конференциската лига ќе го има во Скопје на 23 октомври против Шелбурн од Ирска од 18.45 часот.