Барселона вечерва го пречекува Виљареал во рамки на 37. коло од шпанската Ла Лига, во натпревар кој нема да има значење за каталонскиот гигант кој во минатото коло ја обезбеди шампионската титула.

Новиот тренер на Барселона, Ханси Флик, во пресрет на натпреварот најави нешто што би можело да влезе во клупската историја. Германецот откри дека сериозно размислува за почетен состав кој целосно би се состоел од фудбалери кои потекнуваат од славната академија Ла Масија.

„Разговаравме за можноста сите 11 фудбалери кои ќе започнат на теренот да бидат продукти на Ла Масија. Постојат реални шанси тоа да се случи“, изјави Флик.

Ако Флик навистина се одлучи за ваков состав, тоа би било првпат во 125-годишната историја на Барселона во официјален натпревар да започнат единаесет фудбалери кои и ја поминале славната академија.

Според најавите, потенцијалниот историски состав на Барса кој би можел да истрча на „Камп Ноу“ од 19:00 часот изгледа вака: Ињаки Пења, Ектор Форт, Пау Кубарси, Ерик Гарсија, Давид Одуро, Марк Касадо, Гави, Фермин Лопез, Тони Фернандез, Ансу Фати и Ламин Јамал.