Актуелниот европски првак Барселона од Шпанија во полуфиналето од ЕХФ Лигата на шампионите на завршниот турнир во Келн (17-18 јуни) ќе игра против германскиот Магдебург во „Ланксес“ арената.

Во вториот полуфинален меч полскиот Келце ќе ги одмери силите против ПСЖ од Франција.

На овој Ф4 ќе настапат четири екс членови на Вардар 1961, Лука Циндриќ за Барселона, потоа Игор Карачиќ и Алекс Дујшебаев во дресот на Келце, како и Даинис Кристопанс за ПСЖ на чија клупа е поранешниот македонски селектор Раул Гонзалез. Во редовите на Магдебург е и поранешниот играч на РК Металург, Владан Липовина.

Во втората половина на јуни Келн по 14 пат ќе биде домаќин на завршниот турнир од елитното клупско ракометно натпреварување.

Барселона досега 11 пати ја освојуваше титулата во ЛШ, вклучувајќи ги и последните две изданија, Магдебург до сега се закити со три титули, последната ја имаше во 2002 година. Келце беше најдобар во 2016 година, додека ПСЖ и натаму ја брка својата прва титула, единственото финале го имаше во 2017 година против Вардар 1961, иако ова ќе биде шести настап на францускиот гигант на завршниот турнир во последните осум години.