На ден 10.10.2024 година, Одделот за сузбивање на организиран и сериозен криминал, Единица за финансиски криминал во соработка со Одделот за криминалистичка полиција, поднесе кривична пријава против лицето Ф.Е. од Скопје, за сторено кривично дело „Измама при работењето со хартии од вредност и удели по чл. 275 ст. 3 од КЗ.

„Пријавениот во својство на член на Надзорен одбор на банка од Скопје, злоупотребил внатрешна информација која се однесува на висината на дивидендата за 2023 година, која како член на надзорен одбор ја дознал во текот на 2024 година. На тој начин, користејќи ja ценовно чувствителнaта информација, тој се стекнал со 500 обични акции, по просечна цена на чинење на акција од 16.400,00 денари или вкупно за акциите платил 8.200.000,00 денари. Кривично пријавениот сензитивните информации ги пренел и на трети лица, поточно на членови на негово потесно семејство, со што и тие ја искористиле информацијата и купиле 701 хартија од вредност (акција) на банката, по цена пониска од цената која ја достигнала акцијата. Односно, за акциите биле вкупно платени 11.520.967,00 денари, а тоа овозможило да се стекнат со вкупна корист од 639.000,00 по основ на ценовната промена на акцијата, како и вкупно 646.100,00 денари по основ на дивиденда“, велат од МВР.

Со ова Ф.Е прибавил противправна имотна корист за себе и за членовите на неговото семејство и на тој начин сторил кривично дело „Измама при работењето со хартии од вредност и удели по чл. 275 ст. 3 од КЗ., додаваат од полицијата.