Поранешниот државен секретар на Соединетите Американски Држави Хилари Клинтон, демократскиот филантроп Џорџ Сорос и актерот и режисер Дензел Вашингтон се меѓу 19-те познати личности од различни области на кои ќе им биде доделен Претседателскиот медал на слободата, највисокото цивилно признание во САД, на церемонијата во Белата куќа.

Американскиот претседател Џо Бајден одреди 19 познати личности од политиката, спортот, забавата, граѓанските права и ЛГБТК активизмот да го добијат Претседателскиот медал на слободата оваа година.

Белата куќа соопшти дека добитниците значително придонеле за просперитетот, вредностите и безбедноста на САД и светскиот мир или за други значајни општествени, јавни или приватни потфати.

Постхумно ќе бидат доделени четири медали. Меѓу почестените се Фани Лу Хамер, која ја основаше Демократската партија за слобода во Мисисипи и ги постави темелите за Законот за правата на глас од 1965 година, поранешниот секретар за правда Роберт Ф. Кенеди, Џорџ Ромни кој беше гувернер на Мичиген и служеше како секретар за домување и урбан развој и Еш Картер, поранешен секретар за одбрана.

Споменатиот Кенеди е татко на Роберт Ф. Кенеди Јуниор, кого новоизбраниот претседател на САД Доналд Трамп по именуваше за министер за здравство, а Ромни е татко на поранешниот републиканец од сојузната држава Јута Мит Ромни, еден од најголемите критичари на Трамп меѓу конзервативците.

Меѓу филантропите кои ја добиваат наградата се шпанско-американскиот готвач Хозе Андрес, чија добротворна организација World Central Kitchen стана една од најпознатите добротворни организации во светот, и Боно, фронтмен на рок групата U2 и активист за социјална правда.

Меѓу ѕвездите од светот на спортот и забавата, фудбалерот Лионел Меси, кошаркарската легенда на Лос Анџелес Лејкерс и бизнисменот Ервин „Меџик“ Џонсон, актерот Мајкл Џеј Фокс кој се залага за истражување на третманот на Паркинсоновата болест и научникот Вилијам Санфрод Нај.

Меѓу другите наградени се конзерваторката Џејн Гудал, долгогодишната главна уредничка на Вог, Ана Винтур, американскиот моден дизајнер Ралф Лорен, основачот на Американскиот филмски институт Џорџ Стивен Џуниор, претприемачот и ЛГБТК+ активист Тим ​​Гил и ко-основачот на глобалната инвестициска фирма Карлајл Груп Дејвид Рубенштајн.

И минатата година Бајден додели 19 претседателски медали на слободата, а меѓу добитниците беа Медгар Еверс, Ненси Пелоси, Џејмс Клабер и актерката Мишел Јео.