Ноќта на бакарно-црвената месечина, со моќните настапи на Џекс Џонс, Бејби Лазања, Бајага и Инструктори, Александра Јанева и БДМ, ја донесе спектакуларната „Get EXITed“ забава во Струмица во Големиот градски парк, во заеднички ритам кој ги обедини генерациите.

Духот на „Егзит“ и овојпат, во градот на тромеѓето, донесе посетители од Бугарија, Грција, Србија, Македонија и целиот регион, и по четврти пат ја направи Струмица место за собир во добра енергија, зацврстувајќи ја репутацијата на градот како фестивалска туристичка дестинација.

Пријатната летна ноќ во Струмица донесе настапи на глобалниот хитмејкер Џекс Џонс и регионалните шампиони Бејби Лазања и Бајага и Инструктори. Овој музички маратонски спектакл со своите авторски поп-хитови го отвори струмичанката Александра Јанева и ги воведе посетителите во ритамот на вечерта. Веднаш потоа, на сцената се рашири гитарскиот звук на легендарниот бенд, Бајага и Инструктори, кои со својот спектакуларен настап потврдија дека се носители на културното наследство на едно време. На брановите на заедништвото силно се надоврза настапот на Бејби Лазања, кој дишеше со еуфоријата на новата генерација која јасно порачува дека е подготвена да го трасира својот пат. Диџејската суперѕвездата Џекс Џонс ја доведе атмосферата до вриење со одлично измиксан сет, а публиката го дочека со овации и покажа дека со задоволство ги прифаќа актуелните глобални музички форми. Вечерта за паметење ја затвори триото од Скопје – БДМ, кое го донесе единственото доживување со електронска музика во комбинација со гитара, тапани и вокали, придонесувајќи за целоноќното музичко искуство.

„Егзит“ заедно со челниците на Општина Струмица во изминатите четири години организираше исклучително посетени настапи на големи светски и регионални ѕвезди во Големиот градски парк, приредувајќи ѝ на публиката настани за паметење.

По успешно реализираното годинашно издание на „Get EXITed“, следеше поканата од кандидатот за градоначалник на Скопје, Орце Ѓорѓиевски, за „ЕГзит“ тимот да ја разгледа македонската престолнина како нова дестинација на големата Егзитова светска турнеја за следната година.

„Големо задоволство ни е што добивме покана Скопје да стане дел од Егзитовото фестивалско семејство на градови каде што реализираме фестивали. Младинскиот туризам генерира повеќе од 300 милијарди евра годишно на светско ниво, а фестивалскиот туризам претставува негов најжив дел. Македонската публика од првиот ден е меѓу најверните на ‘Егзит’ и затоа сме подготвени, во партнерство со локалните промотери, организации и музичари, веќе наредната година да покренеме голем фестивал во Скопје и да помогнеме престолнината на Македонија да стане една од водечките фестивалски дестинации во Европа,“ порачаа од тимот на „Егзит“.