Австриско-германска наследничка собира група граѓани за да одлучат како да поделат голем дел од богатството што го наследила од нејзината баба.

Марлен Енгелхорн, која има 31 година и живее во Виена, бара 50 Австријци да утврдат како ќе се прераспределат 25-те милиони евра од нејзиното наследство, пишува „Би-би-си“.

„Наследив богатство, а со тоа и моќ, без да направам ништо за тоа“, рече таа, а потоа додаде: „А државата не сака ни данок на тоа“.

Австрија го укина данокот на наследство во 2008 година, со што стана една од ретките европски земји што немаат данок на наследство, а Енгелхорн смета дека ова е неправедно.

Таа е потомок на Фридрих Енгелхорн, основачот на германската хемиска и фармацевтска компанија „БАСФ“, а наследила милиони откако нејзината баба починала во септември 2022 година. Богатството на Траудл Енгелхорн-Векиато, американскиот магазин „Форбс“ го процени на 4,2 милијарди долари, а пред да почине, нејзината внука изјавила дека сака да предаде 90 отсто од наследството.

Во средата во поштенските сандачиња во Австрија почнаа да пристигнуваат 10.000 покани наменети за случајно избрани австриски граѓани.

Оние кои сакаат да учествуваат во иницијативата на Марлен Енгелхорн, позната како Совет за редистрибуција, можат да се регистрираат онлајн или телефонски. Од тој првичен примерок од 10.000 Австријци на возраст над 16 години, ќе се изберат 50 луѓе и уште 15 заменски членови, кои ќе бидат избрани во случај некои од првичните 50 да се откажат.

„Ако политичарите не ја работат својата работа и не го прераспределат богатството, тогаш јас морам да го сторам тоа сама“, тврди Енгелхорн.

„На многу луѓе им е тешко да врзат крај со крај со полно работно време и да плаќаат данок за секое евро што ќе го заработат. Јас тоа го гледам како неуспех на политиката, а ако политиката не успее, тогаш граѓаните сами треба да се справат со тоа“, вели таа.

Кристоф Хофингер, директор на Институтот за предвидување, кој ја поддржува иницијативата, рече дека советот за прераспределба на парите ќе се состои од 50 луѓе „од сите возрасти, држави, социјални класи и потекло“. Од групата ќе биде побарано „да придонесе со своите идеи за да можеме заеднички да развиваме решенија во интерес на општеството како целина“, рече тој.

Тој ќе учествува на низа средби што ќе се одржат во Салцбург со академици и граѓански организации од март до јуни годинава. Марлен Енгелхорн смета дека нивните дискусии ќе бидат „услуга на демократијата“ и затоа треба да бидат соодветно компензирани за тоа.

„Немам право на вето“, рече таа, додавајќи: „Го ставам мојот имот на располагање на овие 50 луѓе и им ја давам мојата доверба“. Ако не можат да донесат одлука што да прават со парите, тогаш парите се враќаат кај Марлен Енгелхорн.

Не е јасно точно колкав дел од наследството ѝ се дава, иако уште во 2021 година изјави дека сака да подели најмалку 90 отсто затоа што не направила ништо за да го заработи и само имала среќа на „лотаријата за раѓање“. Нејзиниот тим не потврди колку таа ќе задржи, но рече дека задржува некаков вид финансиско „осигурување“.