Селекцијата на Австралија си закажа финален бараж натпревар за пласман на СП во Катар против Перу откако во драматичен натпревар во плеј-офот во азиската конфедерација со 2:1 беше подобра од Обединетите Арапски Емирати.

Натпреварот се играше на стадионот „Ахмад бин Али“ во Ал Рајан на кој ќе се играат и натпревари на Мундијалот во Катар.

Австралија поведе во 53 минута преку Ирвајн, но само четири минути подоцна ОАЕ израмни благодарение на голот на Кадено.

Голот кој ја однесе Австралија на мегдан со Перу го постигна Ајдин Хрустиќ во 84 минута.

Натпреварот помеѓу Австралија и Перу треба да се игра на 13 јуни, исто така во Ал Рајан, а еден ден подоцна е закажан уште еден интерконтинентален бараж натпревар помеѓу Костарика и Нов Зеланд по што ќе бидат познати сите 32 репрезентации што ќе учествуваат на СП во Катар.