Од ВМРО-ДПМНЕ не слушнавме како ќе ги распуштат Судскиот совет и Советот на јавни обвинители. Како заменик министер, но и дел од вработените во Министерството за правда и експертите потенцираа дека како што се наметна, доколку се направи тоа во преодни и заврши одредби да се прекине мандатот е преседан и упад од извршната во судската власт, рече заменик министерката за правда, Викторија Аврамовска-Мадиќ во „Вин-вин“ на Телма.

Таа додаде дека е готов Нацрт-законот кој е работен по препораките од Оценската мисија од ЕУ за Судскот совет и дека таму се предвидува можност за утврдување на одговорност.

– И сега, по стариот закон, ако судиите се одважат, можат да побараат одговорност на членовите на Судскиот совет кои се од редот на судиите – рече Аврамовска-Мадиќ.ж

Таа објасни дека не може да се решава проблемот со корупцијата со распуштање на институцијата која врши избор и разрешување и која утврдува одговорност по барање на судиите.

– Тоа е институција, не е судскиот систем или највисок орган. Проблемот треба да го бараме кај самите судии, поединци – рече Аврамовска-Мадиќ.

Според неа, истакнат правник е поимот што треба да се дефинираме во законот. Една дефиниција е дека професорите од трите најдоброрангирани универзитети ќе може сами да изберат членови на Судски совет на интеруниверзитетска конференција, каде самите ќе делегираат и предложат истакнати професори со минимум 20 години стаж.

– Исто и адвокатите со 20 години стаж ќе може да бидат членови – рече Аврамовска-Мадиќ.

Таа додаде дека за судиите досега условот бил шест години стаж, но со измените тоа се менува со 15 години стаж.

– Судија е судија, завршил академија секако, но друго е судија кој работел шест години и 15 години. Тие ќе имаат повеќе искуство, ќе се стекнати со поголем број на предмети и различни ситуации – рече таа.