Американскиот претседател Доналд Трамп уште еднаш покажа географско и политичко незнаење, мешајќи ги Ерменија и Албанија и погрешно изговарајќи го името на Азербејџан, јавија американските медиуми.

Претседателот се пофали дека успешно посредувал во мирот меѓу „Абербејџан“ и Албанија, сакајќи да каже Азербејџан и Ерменија (на англиски: Armenia). Грубиот лапсус на Трамп се случи за време на радиоинтервјуто со конзервативниот коментатор Марк Левин.

Претседателот во живо ги пофали своите мировни напори, повторувајќи го тврдењето дека „запрел седум војни“ за време на својот втор мандат.

„Знаете, тоа се многу неверојатни, неверојатни работи“, рече Трамп пред да се обиде да ја спомене неодамна договорената мировна декларација меѓу Азербејџан и Ерменија, која ги доближи земјите до мир – но не го заврши целосно нивниот 37-годишен конфликт околу областа Нагорно Карабах.

„Видовте, Абер… бејџан. Тоа беше голем конфликт што траеше 34, 35 години со… Албанија. Размислете за тоа“, рече Трамп.