Општата болница Кавадарци ја тресе голем скандал. Како што открива „Слободен печат“, во оваа болница на 5 октомври годинава бил извршен абортус кај 32-годишна жена без анестезија и само под дејство на кетонал и дијазепам. Причината за ова било тоа што имало контраиндикација за анестезијата и морало интервенцијата да се прави додека пациентката е свесна.

Откако поминале 24 дена после абортусот, кај истата жена во болницата пронашле заборавена газа во вагината, за која за дисциплински престап е казнет специјалист по гинекологија и акушерство вработен во болницата, доктор Борче Сиваков. Доктор Сиваков во изјава за „Слободен печат“ тврди дека не ја ни допрел пациентката, туку абортусот го вршел друг гинеколог.

-Под морална, материјална и кривична одговорност тврдам дека немам никаков контакт со пациентката за што ме теретат. Немам никаков контакт. Ниту сум учествувал во интервенција, ниту сум запознаен со нејзиниот тек на контролите што ги правела, изјави тој за „Слободен печат“.

Уште три медицински лица што биле присутни во салата додека се вршел абортусот, дале изјави на нотар дека доктор Сиваков не ја ни допрел пациентката. Но, ова за Комисијата за утврдување дисциплинска одговорност не значело многу, туку и поверувале на изјавата на пациентката. Така, Сиваков е казнет со 3 месеци кратење по 30 проценти од платата на првостепена комисија, а оваа одлука ја обжалил.

– Има многу недоречености во случајот. На пациентката интервенцијата ѝ е работена на петти октомври, дошла тука на 29-ти октомври. Газата е извадена во четири очи, буквално е избркана медицинската сестра од амбулантата така да многу недоречености има, рече Сиваков.

На прашањето кој лекар ја заборавил газата тој одговори:

-Јас претпоставувам дека газата не е заборавена од доктор туку дека не постоела воопшто газа.  Ова е цел монтиран случај. Бидејќи ако има газа заборавено во вагината нема да има лабораториски наод со ЦРП 0,1 и мирни леукоцити, вели докторот.

Пациентката била таа што се пожалила во болницата и навела дека доктор Сиваков „ѝ рекол после интервенцијата дека мора да ѝ изврши премивање со газа и Бетадин“. Ова Сиваков изрично го демантира и тврди дека не се случило. Специјалистот по гинекологија и акушерство пак кој ја извел интервенцијата, доктор Саша Јовчевски навел дека во текот на интервенцијата воопшто не се употребени слободни гази и истите не се користат во работна рутина при посочената процедура. Наведува дека не видел дека Сиваков го вршел миењето со Бетадин туку дека пациентката тоа му го кажала.

-Од утредента почнав да имам чувство дека имам нешто дебело, внатре во стомакот, вагинално. Помислив дека тоа е од самата интервенција. По околу недела дена почна да ми се надувува стомакот, но помислив дека е проблем со желудникот. На 25 октомври имав силна треска и почувствував непријатен мирис вагинално. На 29 октомври добив неиздржливо силни болки во стомакот и многу посилна непријатна миризба при одење во тоалет. Чувствував нешто тврдо во долниот дел од стомакот. Се исплашив и веднаш дојдов на гинеколошко-акушерското одделение каде на смена беше доктор Софка Павлеска, специјалист по гинекологија и акушерство. Докторката веднаш ми направи преглед при кој што ми беше отстранета голема газа од вагината, која беше стврдната поради тоа што долг период била во мене и ја предизвикуваше непријатната миризба. Бидејќи во тој момент се посомневав како газата се нашла во мене, ја побарав од докторката и ми беше дадена во соодветно затворен сад и истата уште ја чувам, навела пациентката во нејзината пријава до болницата во која побарала санкции.

Нашата редакција ги поседува документите од целиот случај и од нив произлегува дека неколку акушерки и медицински сестри, на нотар дале изјава дека докторот Сиваков воопшто немал контакт со пациентката. Една од нив во изјавата кажува дека Сиваков воопшто немал контакт со пациентката после нејзината интервенција, затоа што веднаш заминал да породува друга пациентка со царски рез.

-На 5 октомври додека се правеше интервенцијата на пациентката од доктор Саша Јовчевски, бев присутна на целата интервенција од почеток до крај. Во врска со оваа интервенција доктор Сиваков немаше никаков контакт и комуникација со пациентката. Јас ја префрлив пациентката во болнички кревет и ја однесов во болничка соба. Од таму отидов директно во операциона сала каде што беше доктор Борче Сиваков со цела екипа и се спремаа за царски рез. Кога заврши мојата смена во 14 часот ја напуштив салата, а операцијата не беше завршена. Иако поминав покрај болничката соба пациентката не беше во кревет. Си заминала, пишува за конкретниот ден кога наводно била заборавена газата, една од присутните во салата.

Директорот на болницата доктор Диме Коцев, во разговор за „Слободен печат“ вели дека одлуката на комисијата не е во сила бидејќи е обжалена и се огради од било какво негово учество во решавањето на случајот. На нашето прашање дали има камери во ходниците од болницата, одговори дека кај хируршките сали камери нема. Така, во овој чуден случај, нема снимки кои што може да ја сведочат вистината за времето на движењето на различните доктори. Комисијата за утврдување дисциплинска одговорност целата доверба ја подарила на пациентката.

– Да, јас бев претседател на таа комисија, ние бевме тројца членови во неа. Едногласно се донесе одлука дека некој таа газа ја има заборавено таму каде што не треба да биде. Од жената што била легната на тој стол, нејзината изјава ќе ја прочитате вие и самите ќе донесете заклучок. Некој таа газа ја заборавил внатре, ни изјави доктор Благој Митев, претседател на комисијата за утврдување дисциплинска одговорност во болницата во Кавадарци и долгогодишен хирург.

Државниот здравствен и санитарен инспекторат направил надзор и препорачал случајот да се разгледа од страна на комисиите за квалитет и за етички прашања. Инаку, во болницата во Кавадарци има нарушени меѓуколегијални односи кои се пресликуваат во бројни петиции за распределување и поплаки меѓу колегите.