Отворањето на уште една концертна сезона на „Стотројка“ ќе биде одбележано со настап во живо на АТА, на 23 август, во 21 часот, во рамките на програмата на музичкото радио Канал 103.

АТА е љубов на прво слушање, посочуваат од Канал 103. Таа е копнеж преточен во женско музичко писмо во најдобрите подземни традиции на македонската музика. Длабокa меланхолиja и разоружувачки искрена лирика, чувства и ноти кои катарзично се ослободуваат.

АТА е музички проект на Атанасија Гулевска. Во 2021 нејзината демо песна „Лакримариум“ беше за првпат емитувана на Канал 103 и оттогаш е на постојана ротација. Неполна година подоцна, со нов и необјавен материјал, време е за деби концерт во бендовска формација, која ја сочинуваат Атанасија Гулевска (вокал), Андреја Салпе (гитара и електроника), Марко Печенковиќ (гитара) и Огнен Златанов (виолина и звучни ефекти), најавија од Канал 103.

Радио серијалот „Ако никој не свири“ е јавен музички сервис кој делува по принципите на самоорганизација и солидарност. Се емитува на „Стотројка“ од 2005 година и досега се реализирани повеќе од 200 концерти на домашни и странски бендови и артисти.