Македонската фудбалска А репрезентација во групата 4 од Ц сегментот во Лигата на нации, го освои првото место со пет победи, едно реми и ниту еден пораз и 16 бодови (гол разлика 10:1), пред Ерменија, Фарски Острови и Летонија.

Резултати: Фарски Острови – Македонија 1:1, Македонија – Ерменија 2:0, Летонија – Македонија 0:3, Ерменија – Македонија 0:2, Македонија – Летонија 1:0, Македонија – Фарски Острови 1:0.

Со првата позиција се преселивме во повисок ранг во натпреварувањето, односно во Лигата Б. Воедно, остануваме во игра за баражот за пласман на Светското првенство кое е на програмата во 2026 година.

Македонскиот репрезентативец Стефан Ашковски настапи на пет од шесте гореспоменати натпревари. Нашиот играч на клупски план ги брани боите на турската екипа Санлиурфаспор.

– Секогаш е убаво чувството кога си прв во групата посебно кога немаш пораз. Мислам дека имавме одличен настап на целосниот циклус на Лигата на нации и некако овој циклус и овие резултати ни донесоа поголема мотивација да продолжиме понатака во ист ритам. Тимот секако го красеше тимски дух и одлична атмосфера, но мислам дека најмногу тактичката дисциплина на нас поставена од селекторот и добрата анализа на противникот – ни изјави македонскиот репрезентативец Стефан Ашковски.

По завршувањето на Лигата на нации, нашата селекција ги доби противниците во квалификациите за пласман на Светското првенство кое ќе се одржи во САД, Канада и Мексико во периодот од 11 јуни до 19 јули 2026 година.

Македонија ќе игра против Белгија, Велс, Казахстан и Лихтенштајн, во рамките на групата Ј. Квалификациите за пласман на СП 2026 ќе ги стартуваме во март. Распоредот на натпреварите во квалификацискиот циклус можете да го погледнете ТУКА

– Па секако интересна група за нас, можеме со секоја од овие репрезентации да играме фудбал, и секако треба да одиме чекор по чекор. Мислам дека сме во добар момент и треба да го искористиме – рече Ашковски.