Скопската градоначалничка Данела Арсовска уште еднаш ја обвини цементарницата „Усје“ дека без престан согорува отпад и го загадува воздухот во Скопје, а и по повеќе од две и пол години Обвинителството не одговара за кривичната пријава која таа и Град Скопје ја поднесоа околу ова.

„Еден од поголемите индустриски капацитети и загадувачи во Македонија, УСЈЕ се пофалиле дека ЌЕ ОРГАНИЗИРААТ КОКТЕЛ во чест на тоа што нема повеќе да можеме институционално да им го потврдуваме загадувањето, а друг никој немало да ги чепка. Знаете сите зошто не смее да се зборува за загадувањето во УСЈЕ, за кривичната пријава која ја поднесовме пред три години за која нема одговор од Обвинителство. Затоа што нè трујат од котлите кои им согоруваат отпад 24 часа, 7 дена во неделата, 365 дена во годината и така прават милионски профити со кои корумпираат со донации и спонзорства на сите страни!“, напиша Арсовска на социјалните мрежи.