Наместо во истрага за криминалот, институциите во Македонија активно учествуваат, поддржуваат и поттикнуваат криминал, вели градоначалничката Данела Арсовска, која денеска објави дека Општина Чаир вчера во 14.44 часот до Агенцијата за катастар на недвижнини поднеле Решение за поништување на Решението кое го издадале за  легализација со фалсификувани документи.

Решението го антидатирале демек е направено на 02.05.2025 за да изгледа дека постапиле пред целиот криминал да биде објавен јавно, ама не можат да покријат дека вчера им е поднесен во катастар неколку часа по нашите пријави во МВР. Срамот да биде поголем во обидот за прикривање докази активно учествуваат Владата и Министерот за внатрешни работи кои наместо да „филозофираат”, треба да постапуваат за да ги фатат криминалците, а не да дозволат тие да ги покријат нивните криминали. До сега требаше да сте во општината и да ги имате обезбедено сите докази а не да им дозволувате на Висар Ганиу и Изет Меџити да си ги покриваат криминалите и да уништувате докази – вели Арсовска.

Таа уште еднаш порача дека Јавното обвинителство мора да постапи во разоткривање на криминалот кој се случува пред очите на целата јавност.

Како што е познато вчера градоначалничката обелодени дека во Чаир е изградена десеткатница на државно земјиште, без платени комуналии и без дозвола за градба, за која се поднесени фалсификувани документи во Агенцијата за катастар за легализација, потпишани од чаирскиот градоначалник Висар Ганиу.

Денеска за своите активности таа доби јавна поддршка и од градоначалникот на Општина карпош, Стевчо Јакимовски.

Арсовска: Следува објава на фељтон со докази за криминал за кои никој не постапувал