Постојаните расправии помеѓу Советот на Град Скопје и градоначалничката Данела Арсовска, нефункционирањето на градот, незавршените проекти и неисполнување на ветеното во предизборната програма за модерно Скопје, сѐ повеќе го зголемува незадоволството на граѓаните, па и на оние кои на изборите гласаа за Арсовска и ја донесоа таму каде што е сега.

И покрај тоа што градоначалничката се пофали дека за една година сработила повеќе од 300 проекти, она со што скопјани се соочуваат во секојдневниот живот говори спротивно – градот е нечист, јавниот превоз никогаш не бил полош, а градот и понатаму високо котира на листата на најзагадени главни градови во светот.

Расположението на граѓаните кон градоначалничката и актуелниот советнички состав се покажа и во последната анкета на американскиот Меѓународен републикански институт (ИРИ), каде од 1207 испитаници дури 57 отсто се изјасниле како „целосно незадоволни или донекаде незадоволни“ од работата на Арсовска, а 54 отсто се незадоволни од работата на Советот на Град Скопје.

Од работата на Арсовска се целосно или донекаде задоволни 39 отсто од испитаниците, а за Советот на Град Скопје се изјасниле 30 проценти.

Во однос на тоа што е тоа што најмногу ги мачи скопјани, 21 отсто од испитаните граѓани како најголем проблем го споменале во анкетата е урбаното планирање и развојот. Загадувањето и јавната хигиена се подолу на листата со 8 и 4 проценти.