Арсовска ги игнорира угостителите: Бараме средба, но веќе трета недела немаме одговор
Дали навистина граѓаните, гостите и угостителите на Град Скопје добија независен градоначалник или бившата претседателка на Сојузот на стопански комори на Македонија и неговите членки си добија сопствен градоначалник, прашуваат од Националната угостителска комора.
Препорачано
Од Независната угостителска комора на 25 ноември 2021 година доставиле барање до Градоначалничката за работна средба – работен појадок со угостителите од Град Скопје и дискусија за унапредување на угостителската индустрија во Град Скопје, додека на 1 декември 2021 година доставиле и потсетување на поканата за работна средба – работен појадок со угостителите од Град Скопје.
Како што велат оттаму, дури и двата телефонските разговори со секретарката на Кабинетот на градоначалничката не вродиле со резултат на добивање конкретен одговор.
– Со цел да можеме да се запознаеме повеќе со програмите, плановите и идеите што Градоначалниците ги планираат за развој и поддршка на угостителите и угостителскиот сектор и да ги информираме за очекувањата и проблемите со кои угостителите на локално ниво се соочувале во минатото работење започнавме со барања за организирање на годишни работни средби, велат од НУК.
Како што стои во соопштението, првото барање е доставено до градоначалничката на Град Скопје со цел да се запознаат со нејзината програма за поддршка, развој и унапредување на работењето на угостителите и ноќниот живот. Во иницијалното барање доставиле предлози на генерални точки за дискусија и тоа:
- Планирани активности и стратегии на Град Скопје поврзани со угостителите и угостителската индустрија за време на мандатот на новата градоначалничка Данела Арсовска;
- Можности и начини на соработка со Градот Скопје и македонските општини односно ЗЕЛС за начини и бенефити од креирање на единствен заеднички национален регистар на угостителски објекти, сместувачки објекти од мал обем и регистар на физички лица што вршат угостителска дејност;
- Барање за отворање на Канцеларија за ноќен живот и култура и именување на Градоначалник за ноќен живот по примерот на останатите Европски главни градови за промоција на ноќниот живот;
- Предлози, насоки и стратегии за развој на угостителската индустрија во Град Скопје од страна на угостителите со барање за усогласување на постојните правилници на локално ниво поврзани со угостителската индустрија.
– Жално е што и покрај потсетувањето и телефонските контакти веќе трета недела немаме никаков одговор. Игнорантскиот однос ни укажува или новата Градоначалничка ниту имала ниту планира никаква програма и идеја за поддршка, развој и унапредување на работењето на градските угостители или едноставно и просто кажано нема намера воопшто да се замара со угостителите на град Скопје кои не се членки на Сојузот на стопански комори на Македонија, стои во нивното писмено соопштение до јавноста.
