Полковникот во пензија и поранешен портпарол на Генералштабот на АРМ, Тони Јаневски, е гостин во најновата епизода на емисијата „Пресврт“. Гостинот, кој е со огромно искуство на полето на одбраната, во студиото на „Слободен печат“ говори за активностите што се одвиваат на наш терен со вежбата на македонската армија „Брз одговор 2025“ на полигонот во Криволак. Дали полигонот Криволак може да се претвори во економски ресурс за државата, предизвиците поврзани со модернизацијата на Армијата, како и за позицијата на Македонија пред претстојниот самит на НАТО во Холандија, а со тоа и барањата за зголемување на трошоците за одбрана. Полковникот во пензија се осврна и на состојбите во Украина и дали наскоро ќе имаме траен мир во Европа. Ова се дел од темите и прашањата за кои пензионираниот полковник Тони Јаневски зборуваше во емисијата „Пресврт“.

„Криволак одамна е препознаен од нашите сојузници, особено од САД, како исклучително вреден стратешки ресурс – вистински скапоцен камен. Иако за некои изгледа како полупустински терен, токму таа разновидност му овозможува да биде погоден за различни типови воени операции. Тука се изведуваа вежби од висок профил, како „Swift Response“, со 700 падобрански скока, користење на хеликоптери „апачи“ и активности поврзани со атомско-биолошко-хемиска одбрана. Тоа покажува дека Криволак ги исполнува стандардите на НАТО. Потенцијалот е огромен – вели Јаневски.

Тој во исто време посочува дека Криволак како безбедносен адут за земјава може да донесе и економска добивка, но за тоа му недостасува малку меѓународен маркетинг.

-Да, недостасува маркетинг – но не политички, туку стратешки и промотивен. Имаме политичка согласност и континуитет во користењето на Криволак како долгорочна инвестиција, што веќе ја враќа довербата кај нашите сојузници – посочува Јаневски.

Јаневски во емисијата зборуваше и за процесот на модернизација на Армијата, кои според него можеби се недостатоците на АРСМ во овој момент, како тече постапката со нашите сојузници, за претстојниот самит на НАТО во Хаг и како Македонија би можела да одговори на барањата на Алијансата за  5 % од БДП на земјава да одат за одбраната.

Целиот разговор со поранешниот портпарол на Генералштабот на АРМ, полковникот во пензија Тони Јаневски, можете да го погледнете вечер во 19.00 часот на каналот на Јутјуб  и порталот на „Слободен печат“ во емисијата „Пресврт“ со Дејан Србиновски.