Пратеникот и лидер на партијата Левица, Димитар Апасиев, обвини дека Владата заедно со АВМУ, преку спорно толкување на Изборниот законик и ново упатство за рекламирање, подготвува удар врз Левица со кој партијата ќе остане без околу 400.000 евра и без пристап до националните медиуми пред изборите.

Апасиев најави тужби и побара Уставниот суд итно да реагира со времена мерка.

„Хибридниот вмроиден режим, директно по директива на премиерот Мицика, во дослух со вечниот директор на АВМУ (подлизуркото Зоран Трајчевски), за утре го планира финалниот удар против Левица за овие избори. Имено, гледајќи го порастот на анкетите и не можејќи да смислат соодветен противотров – сакаат илегално, преку ‘креативно толкување’ на Изборниот законик, со Упатство за рекламирање, да ја оштетат Левица за приближно 350.000 до 400.000 евра. Со ова не само што ќе ни ги ускратат парите за платено политичко рекламирање, кои по закон ни следуваат, туку и ефективно ќе ни забранат пристап до портали, национални телевизии и медиуми (дури и кога би сакале самите да си платиме)“, објави Апасиев на социјалните мрежи.

За ова ќе следуваат низа тужби и кривични пријави против членовите на Советот на АВМУ, додава тој, „но јавно го повикуваме Уставниот суд со временска мерка, донесена по службена должност, да ја суспендира примената на ова драконско и контроверзно упатство, како смислен недемократски удар врз парламентаризмот и плурализмот, кои се уставна категорија.

„Колку за илустрација – на пример, на Моника Зајкова од ЛДП (со 1 пратеник) би ѝ следувале околу 300.000 евра за реклами на ТВ, а на Левица (со 6 пратеника) – би ѝ следувале нула евра + банирање на која било телевизија! За ова, некој ептен дебело ќе го крка“, вели лидерот на Левица.