Ако минатите години неработните денови за најголемиот христијански празник Велигден, Македонците најчесто ги користеа за кратки патувања надвор од границите на државата или внатре во неа, оваа година поради економската криза, скапите горива но и поскапените туристички аражмани, граѓаните во поголем дел ќе останат во своите домови.

Ова впрочем го говорат и резултатите од спроведената анкета на порталот на Слободен печат, во која дури 79,84 од испитаниците на нашето прашање на неделата „ Дали планирате патување за престојните празнични неработни денови“ одговориле со „Не“. Во исто време нешто повеќе од 20 отсто од анкетираните одговориле дека сепак планираат да заминат на некое патување.

Скопјанецот Горјан Димитровски е едниот од граѓаните кои заедно со неговата сопруга се решил да замине надвор од земјава за престојните неработни денови. Тој како дестинација за празниците ја одбрал Србија објаснувајќи при тоа дека домашниот буџет во моментов тоа му го дозволува.

– Со сопругата долго време размислувавме каде да отидеме и малку се релаксираме за Велигден и престојните празници и во однос на семејните финансии одлучивме тоа да е во Белград. Иако во сопствена режија заминуваме, трошоците за некоколку дена во соседна Србија не се ни малку ниски имајќи го во предвид поскапеното гориво. Слободно можам да кажам дека за три четири дена, можно е да се потроши една просечна плата што споредбено со изминатите години воопшто не е малку – вели Горјан за Слободен печат.

Од друга страна триесет и шест годиншиот Бојан Стојановиќ вели дека скапотијата не му дозволила овие празнични денови да замине негде.

– Поскапени се горивата, храната и сместувањето а платите стагнираат. Најголемиот христијански празник Велигден оваа година сепак ќе го поминам дома со семејството бидејќи не можам да си дозволам голем трошок за три дена кој може да ми ги поремети останатите денови од месецот – кратко ни изјави Бојан.

Од туристичката агенција „Савана“  пак велат дека со оглед поскапените цени во државите од регионот но и пошироко, значително е намален и интересот за патување. Сепак, од агенцијата потенцираат дека зачудувачки во исто време има зголемени патувањата на македонските граѓани за празниците во Истанбул и Париз.

– Автобуски патувања засега најмногу се реализираат за Србија и Грција. Овие две дестинации и натаму остануваат да имаат најголем интерес кај граѓаните бидејќи цените но и условите што ги нудиме се повеќе од задоволувачки. Сепак, има и релативно голем број на граѓани кои заминуваат некаде подалеку за празнициве како на пример во Париз, Италија или Истанбул – велат од Савана.

Од туристичката агенција информираат дека како секаде во светот и кај нив се зголемени цените на аражманите за патувања поради поскапените горива и тоа во просек за 30 отсто. Од таму појаснуваат дека ако минатата година за едно четиричлено семејство за неколку дневен одмор во хотел од средна класа на море чинело околу 1200 евра, оваа година тоа ќе изнесува околу 1800 евра.

Во меѓувреме, според нашите информации и пресметките кои ги направивме, за три ноќевања за двајца со појадок, во Охрид ќе треба да издвоите околу 130 евра, и тоа доколку планирате да престојувате во хотел од средна категорија. Најевтино може да поминете во Попова кула во Демир Капија каде за три ноќевања по лице ќе треба да платите околу 4000 денари, или околу 135 евра за двајца за три ноќевања.

Паралелно на ова цените на приватните апартмани во Охрид за едно ноќевање на огласите се движат од 1.500 денари па се до 6.000 во зависност од опремата на апартманот, локацијата и сл.