Првиот македонски долгометражен анимиран филм „Јон Вардар против Галаксијата“ беше прикажан на 48. издание на престижниот фестивал „Мостра Сао Паоло“ во Бразил. Филмот во режија на Гоце Цветановски е дел од компетитивната програма во секцијата Нови режисери.

Македонскиот суперјунак има четири проекции во рамки на фестивалот, кој годинава во својата програма ги вклучи и победниците на Кан, Берлинале, Венеција, Сан Себастијан и други врвни филмски фестивали. Фестивалот се одржува од 17 до 30 октомври.

Режисерот Цветановски во Бразил изјави дека Сао Паоло има посебна енергија, и е милионски град со вибрантна културна сцена и развиена почит за уметноста.

– Самата номинација за најдобар филм и најдобар нов режисер е признание со кое целиот тим се гордее. Бразил е земја која одамна сонував да ја посетам, и се надевам дека ова е само прво од моите идни патешествија во Јужна Америка – истакнува Цветановски.

Филмот „Јон Вардар против Галаксијата“ е најголемиот анимиран копродукциски проект на Балканот. Изработен е со финансиска поддршка од Агенцијата за филм на Северна Македонија, а има копродукции во Унгарија, Бугарија и Хрватска.

Станува збор за хумористична приказна за еден натпросечно потпросечен човек, еден нарцисоиден робот и многу, многу, мнооооогу вонземјани кои се на мисија да ја спасат Галаксијата од самите себеси. По македонската премиера на фестивалот „Киненова“ на 15 октомври, филмот од 1 ноември ќе се прикажува во „Синеплекс“ во Скопје.