В четврток во рамките од ЕХФ Лигата на шампионите ракометарите на Еурофарм Пелистер против ППД Загреб (18.45 часот) во салата „Боро Чурлевски“ во Битола ќе го одиграат 10 натпревар сезонава, а последен за оваа година.

Актуелниот македонски првак и натаму ги брка првите бодови во групата „А“, а од друга страна за хрватскиот шампион ова е важен меч да се остане во игра за едно од местата кои водат во следната фаза.

Тренерот на битолската екипа, Бранислав Ангеловски на прес конференција ги сподели очекувањата во пресрет на новиот меч во ЛШ.

– Кај нас доаѓа една ракометна институција. Ако погледнеме во минатото, не треба ни да зборуваме за името на клубот. Доволно е да кажеме дека сите репрезентативци на Хрватска кои биле олимписки, светски шампиони морале да пројдат низ таа школа. Имаат одлична млада генерација која во иднина ќе биде исклучително добра на ракометните терени. Една искусна екипа и точно е тоа дека имаат еден спој на искуство и младост. Од поискусните тука мислам на Чупиќ, Дибиров, Гојун, на трите стратешки позиции кои ја прават таа нивна одбрана толку хомогена и густа која ќе биде малку тешко условно да ја разбиеме. Загреб игра добро, константно, за мене не е ни под прашање нивното учество во следниот круг на ЛШ. Тоа што го покажуваат во нивните игри, навистина фасцинираат, но од друга страна имаат и маани на кои ќе обрнеме внимание и ќе бидеме максимално спремни за нивната игра, како во напад, така и во одбрана – изјави Ангеловски.