Еурофарм Пелистер го освои првиот бод сезонава во ракометната Лига на шампионите, пред своите навивачи во салата „Боро Чурлевски“ во Битола ремизираше против Спортинг со 24:24.

Во натпревар полн со пресврти на крајот актуелниот македонски првак успеа да избегне пораз против португалската екипа која оствари три победи од стартот на групната фаза.

– Освоивме голем бод. Конечно скршивме еден товар што го носиме долго време. Мислам дека моите играчи беа вистински борци кои веруваа до крајот. Игравме против многу силен противник – се зборовите на тренерот на РК Еурофарм Пелистер, Бранислав Ангеловски, на официјалниот сајт на ЕХФ.

Следниот меч битолската екипа во ЛШ ќе го има на 17 октомври на гости против Висла Плоцк од Полска.

Моментно во групата А во некомплетното четврто коло Спортинг е на врвот со седум бодови, пред ПСЖ и Динамо Букурешт кои имаат по шест, следуваат Фуксе Берлин и Веспрем со по четири, еден има Еурофарм Пелистер, а без бодови се Висла Плоцк и Фредерициа.