Фудбалската репрезентација на Македонија утре ќе ја има првата од двете контроли пред настапот на Европското првенство, противник е селекцијата на Словенија.
Селекторот Игор Ангеловски нема намера да експериментира и вели дека фудбалерите се подготвени за дуелот со Словенија кој ќе се игра на Националната Арена „Тодор Проески“.

– Момците работат одлично. Во минатите три години Македонија била таа што спарингувала со учесници на големи натпреварувања, но сега ние сме тие кои одиме на првенство, па одбираме и противници за спаринг. Словенија е добар противник со кој игравме во квалификациите и затоа очекувам добар натпревар, прва подготовка за тоа што не очекува на ЕП. Овие два меча, како овој со Словенија, така и тој со Казахстан ќе ни послужат за проверка, ама не за експериментирање. Јас не сум тренер кој сака да експериментира. Тоа што ни е потребно ќе го направиме – вели Ангеловски.

По пауза од две години, фудбалерите повторно ќе играат пред навивачи. Според најавите, сите влезници (10.000) се продадени и Пандев, Елмас, Ристовски и останатите ќе имаат максимална поддршка од трибините.
– Фудбалот се игра за публика, искрено имаме позитивна трема. Посакуваме да се наполни стадионот максимум колку е дозволено. Нашите навивачи кои ни даваа поддршка, а не можеа да дојдат на стадион, утре се надевам дека ќе напраат вистинска атмосфера бидејќи овие дечки тоа го заслужувааат – додава Ангеловски.