Денеска е вториот ден од Европскиот младински олимписки фестивал – ЕМОФ Скопје 2025 на кој ќе настапуваат и македонските џудисти.

Првиот од нив беше Ангел Радевски кој во категоријата -50 кг. претрпе пораз во првото коло од Рза Халили од Азербејџан со резултат 21:0 во спортскиот центар „Јане Сандански“.

Во репасажот Радевски загуби и во мечот против Унгарецот Милан Шабо. Повеќе ТУКА

На 23 јули во 10.10 часот во категоријата -66 кг. Марко Панчевски за противник го има Рони Решитај од Косово во првото коло, потоа во 11.00 часот во категоријата -52 кг. Дариа Јованова на стартот ќе се бори против Еја Виборг од Исланд, а во 11.05 часот во категоријата -48 кг. Анамарија Стојмиловска за противничка ќе ја има Селин Идир од Франција.

На 24 јули во 10.15 часот во категоријата -73 кг. во првото коло Антонио Стојчевски ќе ги одмери силите против Тигран Сариханјан од Ерменија, додека во категоријата -81 кг. Никола Петров ќе се соочи против Амин Мехдијев од Азербејџан (10.55 часот).

Џудо репрезентацијата на Македонија на ЕМОФ 2025 е предводена од тренерите Игор Паскоски и Александар Фузевски.

Настапот на ЕМОФ Скопје 2025 не е само спортски настан, туку и симбол на сонот, дисциплината и посветеноста на овие млади таленти. Тие се иднината на македонскиот спорт и амбасадори на нашата култура, вредности и спортски дух.