Капитенот на македонската женска сениорска кошаркарска репрезентација, Анџелика Митрашиновиќ беше прв поентер на турнирот во Подгорица, Црна Гора.

Заедно со Шарека Мекнил од Војводина, Митрашиновиќ е прогласена за најдобар стрелец на Фајнал-фор турнирот од ВАБА лигата кој се одржа изминатиот викенд во Подгорица.

Нашата репрезентативка беше единствената светла точка во екипата на Монтана на собирот на најдобрите четири екипи во женската Јадранска лига. Екипата на Монтана заврши на последното место на „фајнал-фор“ турнирот.

Во двата натпревари кои ги одигра во црногорскиот главен град, Митрашиновиќ постигна вкупно 42 поени, колку што имаше и Мекнил. На мечот за третото место, против екипата на Војводина, нашиот репрезентативен бек реализира 28 поени, или точно половина од вкупниот број постигнати на нејзината екипа.

Инаку, титулата во ВАБА лигата и оваа сезона ја освои словенечкиот тим Цинкарна Целје која во финалето го победи домаќинот Будуќност со минимални 66:64, а за најкорисен играч на завршниот турнир беше прогласена Блажа Чех од шампионскиот состав.