Андреас Трајковски испиша историја со своето учество во финалето на Европското првенство во атлетика во сала и го освои осмото место во скок во далечина.

Овој резултат е огромен успех за македонската атлетика и спорт воопшто, бидејќи Трајковски стана првиот наш атлетичар што се пласирал во финале на едно Европско првенство во атлетика.

По фантастичниот скок од 7,85 метри во квалификациите, во петокот неговиот најдобар скок беше 7,65 метри, остварен во третата серија.

– Секако дека сакав повеќе, но самиот пласман во финалето за мене и Македонија е голем успех. Се останато беше бонус. Дадов сѐ што можев, за себе и за Македонија. Јас сум осмиот најдобар скокач во далечина во Европа. Тоа за мене е големо достигнување – изјави Трајковски после финалето.

Сензација направи Божидар Сарабујуков од Бугарија кој со скок од 8,13 метри во последната серија го освои европското злато. Сребрениот медал заврши кај Италијанецот Матија Фурлани (8,12 метри), а со бронза се закити Лестер Лескеј од Шпанија (8,12 метри, но послаба серија).