Тренерот на Реал Мадрид, Карло Анчелоти изјави дека неговиот тим успеал да го „извлече последниот атом од силата“ и да го смени резултатот против Манчестер сити. Реал победи на домашен терен во реваншот од полуфиналето на Лигата на шампионите по продолженијата со 3:1, а во финалето се пласираше со вкупен резултат 6:5.

– Бевме блиску до елиминација, но успеавме до последниот атом од силата што го имавме да го промениме резултатот. Одигравме добар натпревар против силен ривал. По пресвртот имавме психолошка предност во продолжението. Не можам да кажам дека сме навикнати на вакви натпревари, но ова се случи и против ПСЖ и Челси – вели Анчелоти, а пренесува „Скај Спорт“.

Италијанецот воедно изјави дека ако „мора да каже“ што е иницијаторот на пресвртот, тоа е „историјата на клубот“ што не дозволува тимот да се предаде дури и кога се чини дека „нема враќање назад“.

– Среќен сум што сме во финалето, и што ќе играме против уште еден голем тим. Ќе биде фантастичен натпревар – вели тренерот на „кралевите“.

Реал во финалето ќе се сретне со Ливерпул, а натпреварот е закажан за 28 мај и ќе се игра во Париз, Франција. Досега Анчелоти, Марчело Липи, Алекс Фергусон и Јирген Клоп имаа по четири финалиња, но Анчелоти сега се одвои на врвот. Тој беше дел од три финалиња во Лигата на шампионите со Милан (2003, 2005, 2007), а две со Реал Мадрид (2014, 2022). Двапати славеше со „Росонерите“ (2003, 2007) и еднаш со „кралевите“ (2007).