Амбасадорот на Јужна Африка во Франција, Нкосинати Емануел Мтетва, пронајден е мртов, по пад од 22-ри кат од хотелот „Хајат“, недалеку од Триумфалната капија во Париз.

Француското обвинителство потврди дека телото на 58-годишниот дипломат било пронајдено денеска пред хотелот.

Според локалните извори, се верува дека станува збор за самоубиство, откако амбасадорот наводно скокнал од прозорец.

Обвинителството наведе дека сопругата на амбасадорот претходната вечер добила „загрижувачка порака од него“ и поднела пријава за исчезнување. Телефонот на Мтетва последен пат бил активен во понеделникот околу 15 часот. Тоа ја поттикнало полицијата да распореди специјални тимови и кучиња трагачи на локацијата, на која што последен пат бил активен, стравувајќи од можност за самоубиство.

Весникот „Ситизен“ пренесува дека дипломатот последен пат бил виден во петок, но не се појавил на серија дипломатски состаноци закажани за викендот, што дополнително ги зголемило сомнежите.

Мтетва, освен што беше амбасадор во Франција, имаше акредитација и во Монако, а истовремено беше и постојан делегат на Јужна Африка во УНЕСКО.

Јужноафриканското Министерство за меѓународни односи и соработка најави дека ќе соработува со француските власти за целосно расчистување на трагичниот настан.