Карлос Алкараз во неделата го победи Јаник Синер и го освои трофејот на САД Опен, со што заработи импозантна парична награда од пет милиони долари. Но, иако на хартија звучи како огромна заработка, реалноста е дека на сметката на младиот Шпанец ќе легне речиси половина од таа сума.

Според американските даночни прописи, Алкараз влегува во највисоката даночна категорија со стапка од 37% за приходи над 609.000 долари, што значи дека само за данок ќе му бидат одбиени околу 1,7 милиони долари. Дополнително, тука е и данокот на Њујорк кој изнесува 9,65%, како и низа други локални давачки, со што нето-заработката се сведува на околу 2,5 милиони долари.

Во оваа сума не се пресметани дополнителните трошоци за патувања, сместување, како и платите за тренерскиот и ПР-тимот кој стои зад секој професионален тенисер, особено кога станува збор за ѕвезда од рангот на Алкараз.