Првиот меч на шпанскиот тенисер Карлос Алкараз на турнирот во Рио де Жанеиро, Бразил, траеше само два гема.

Вториот светски рекет го истегна зглобот веќе во вториот поен против Бразилецот Тијаго Монтеиро, се обиде да игра, но по десет минути мораше да се откаже. Резултатот беше 1:1.

– Не е толку лошо. Физиотерапевтите ми рекоа дека не  е сериозно. Почувствував многу силна болка кога паднав. Во тој момент се чувствував многу лошо и знаев дека ќе биде комплицирано да продолжам. Му кажав на мојот тим дека ќе пробам два гема, и ако не можам, ќе се откажам. Да продолжев, ќе беше многу полошо – рече Алкараз.

Сега започнува битката на докторот со времето. Алкараз има закажано егзибициски меч со Рафаел Надал во Лас Вегас за 11 дена во режија на „Нетфликс“.

И самите организатори на овој дуел не се сигурни бидејќи никој од учесниците не е здрав. Надал пред седум дена се повлече од турнирот во Доха, а сега неизвесно е и учеството на Алкараз.