Во еден драматичен натпревар екипите на Алкакоид и Вардар 1961 одиграа реми 26:26 во рамките на плеј-офот од македонската ракометна Суперлига. После првото полувреме исто така беше нерешено во салата Автокоманда во Скопје (12:12).

Алкалоид стекна убава предност на стартот од мечот (5:2), но константно се враќаше резултатски Вардар и израмнуваше, поведувајќи и со 8:7.

Повторно тимот на Кирил Лазаров во следниот период одржуваше позитива од еден-два голови разлика, но на паузата ниту еден од тимовите не беше во водство.

Во вториот дел поинаква слика на теренот, „црвено-црните“ подобро почнаа, одржуваа 1-2 голови разлика, а во еден момент стигнаа и до највисоки 19:15.

Алкалоид не се предаваше, успеа да се врати со серија од 5:1 за нерешени 20:20 на семафорот. Се влезе во неизвесна завршница, повторно Алкалоид одржуваше минимална предност почнувајќи 23:22, но секој пат Вардар успеваше да израмни, така беше и во последната минута кога при негатива од 26:25, Лазаревски му донесе бод на гостинот.

Најефикасен играч во домашниот тим беше Мартинд Серафимов со осум голови, три повеќе од Мартин Ивановски. На спротивната страна Вуко Борозан постигна седум погодоци, а шест беа дело на Милан Лазаревски.

На табелата води Вардар со 13 бодови, колку што има и второпласираниот Еурофарм Пелистер, а на третата позиција е Алкалоид со девет. Во следното коло Вардар на 25 мај ќе го пречека Бутел, додека Алкалоид истиот ден ќе оди кај Тиквеш.