Според грчката митологија, амброзија е храна на боговите од Олимп. Тие, според сите приказни и легенди, се хранеле со амброзија и го пиеле нектарот. Овој тип на исхрана им обезбедувал бесмртност.

Полубоговите кога ја јаделе, се чувствувале многу подобро. Меѓутоа, амброзијата во големи количини може да биде фатална. Ова исто така важи и за нектарот.

Денес многу луѓе бегаат од амброзија – ја заобиколуваат во широк круг за случајно да не ѝ го вдишат поленот.

Овој агресивен плевел, кој нѐ прогонува сѐ до октомври, е голем алерген. Поради временските услови годинава подрани, па веќе многумина се жалат дека поради амброзијата не можат да дишат.

Насолзени очи, кивање, течење на носот или отежнато дишење не секогаш лесно се совладува. Сè уште не постои универзален лек за алергија на амброзија, но со некои постапки и третмани сепак, можеме да ги ублажиме симптомите.

Утрата се најопасни

Амброзијата создава најмногу проблеми наутро, кога со првото сонце го отвора својот цвет и почнува да шири полен околу себе.

Ако загрозената личност тогаш отвори прозорец, проблемите нема да ја заобиколат. Исто така, во овој период од денот, алергичните не треба да го проветруваат домот, ниту постелнината.

Луѓето кои се алергични на амброзија, прозорците треба да ги отвораат попладне или навечер, со самракот, кога почнува да опаѓа надворешната температура.

Најдобро е тоа да се направи 15 минути по дожд – ненадејниот летен дожд ја принудува амброзијата да се заштити со затворањето на своите цветови.

И ова треба да го направите

Ако не сте во можност да останете во затворен простор во критичниот дел од денот поради природата на вашата работа или други активности што треба да ги извршите, постојат некои чекори кои ќе ви помогнат.

Кога ќе се вратите дома, задолжително соблечете ја облеката што сте ја носеле, за поленот да не влезе во секој агол и да ви зададе нови проблеми.

Не чекајте да се наполни машината за перење алишта (задолжително затворете ја вратата на машината!), подобро е веднаш да ја исперете облеката. Се разбира, немојте да ја сушите надвор.

Исто така, задолжително истуширајте се и измијте ја косата.

Кога ќе ја исушите, освежете се така што ќе го вклучите клима – апаратот, чиј филтер ќе спречи опасниот полен од амброзија дополнително да ви наштети.

Ова се однесува и на возењето автомобил – не отворајте ги прозорците за да се разладите, туку вклучете ја климата.

Ако ова не ви помогне и не можете без терапија, не земајте ја напамет, на своја рака. Обратете се кај алерголог кој ќе ви го даде најдобриот совет врз основа на вашите симптоми и ќе ви даде соодветна терапија.