Денеска Александар Бајевски ја информираше јавноста дека повеќе не е спортски директор на фудбалскиот клуб Вардар.

Во изминатите две години го водеше спортскиот дел на клубот, воедно им се заблагодари на сите играчи, тренери и вработени со кои соработуваше.

– Сакам да ја известам целата спортска јавност и армијата Вардарови навивачи дека од денес повеќе нема да ја извршувам функцијата спортски директор на Вардар. Благодарен сум на најголемиот спортски бренд во државата што ми даде шанса и доверба да го водам спортскиот дел на клубот изминативе две години. Чест ми е што бев тука кога беше најтешко и што бев дел од црвено-црното семејство кое со натчовечки напори успеа во „невозможната цел“ да се врати таму каде што припаѓа.

Се заблагодарувам на сите играчи, тренери и вработени во клубот со кои соработував. Никој никогаш нема да може да ја избрише нашата посветеност и приврзаност преку која заеднички поминувавме преку сите препреки кои ги имавме. Порака за навивачите да продолжат да бидат со и покрај клубот во добро и лошо. Вардар е еден и единствен! Од денес продолжувам да бидам најголем навивач на клубот во кој го поминав најголемиот дел од мојот живот. До следна прилика, во некои подобри времиња…НАПРЕД ВАРДАР ВО СРЦЕ ТЕ НОСАМ! – стои во објавата на Бајевски на социјалните мрежи.

Во својата професионална кариера како фудбалер со Вардар успеа да биде шампион на Македонија во натпреварувачката сезона 2001/2002.