Адвокатите на американскиот актер Алек Болдвин побараа од судијата да ги отфрли обвиненијата против актерот за убиство од небрежност на кинематограферката Халина Хачинс во 2021 година, за време на снимањето на вестерн-филмот „Рѓа“.

Судењето е закажано за 10 јули во американската сојузна држава Ново Мексико, објави „Ројтерс“.

Адвокатите на Болдвин во четвртокот поднесоа барање за отфрлање на обвиненијата против Болдвин, осум дена откако поротата ја прогласи за виновна реквезитерката Хана Гутиерез-Рид за убиство од небрежност во одвоено судење.

Гутиерез треба да биде осудена на 15 април и се соочува со затворска казна до 18 месеци. На Болдвин му се суди и за убиство од небрежност, а „Би-би-си“ тврди дека пресудата на Гутиерез-Рид може да биде олеснителна околност за актерот, кој се изјасни за невин.

Неговите адвокати сега можат да тврдат дека Болдвин не можел да предвиди дека има муниција во пиштолот на снимката, бидејќи тоа е одговорност на реквезитерот. Судот во Ново Мексико повторно го отвори кривичното дело против актерот на 19 јануари, повеќе од две години по инцидентот и девет месеци откако прво беше обвинет за смртта на Хачинс.

Претходните обвиненија против него беа отфрлени минатиот април, кога обвинителите во Ново Мексико соопштија дека на виделина излегле нови информации кои налагаат понатамошна истрага и откако обвинителите соопштија дека се појавиле нови докази од форензичките тестови за оружјето користено во пукањето.

Актерот се изјасни за невин на 31 јануари. Инцидентот се случил во октомври 2021 година кога Болдвин вежбал пукање со пиштол, а тој тврди дека мислел дека пиштолот не бил наполнет со вистински куршуми.