Иако доматите се сметаат за здрава и корисна намирница, кај одредени луѓе со почувствителни здравствени состојби, тие можат да предизвикаат голем број непријатни, па дури и сериозни проблеми.

Поради високата киселост, доматите можат да ги влошат симптомите кај луѓето кои страдаат од гастритис или гастроезофагеален рефлукс. Дури и здравите луѓе можат да доживеат киселини во желудникот по консумирање големи количини домати или домати во сос.

Прекумерната консумација може да предизвика и болка во зглобовите. Виновникот е соединението соланин, кое природно се наоѓа во доматите и може да го стимулира таложењето на калциум во ткивата, што доведува до воспаление, оток и болка, пишува порталот „Крстарица“.

Луѓето со проблеми со бубрезите исто така треба да бидат внимателни. Доматите се богати со оксалати и калиум, супстанции кои можат да ги оптоварат бубрезите и да го поттикнат формирањето на камења во бубрезите.

Алергиските реакции на доматите не се ретки. Поради присуството на хистамин, може да се појави осип, отекување на јазикот или други симптоми, особено кај луѓе со дијагностицирана алергија.

Кај луѓето кои страдаат од синдром на иритабилни црева, доматите можат да бидат причина за грчеви, надуеност, дијареја (пролив) или запек, поради што се препорачува избегнување кисели намирници.

Во ретки случаи, прекумерната консумација може да доведе и до состојба позната како ликопенодермија – пигментација на кожата предизвикана од прекумерен внес на ликопен, природниот црвен пигмент во доматите.

Поради високата киселост, доматите можат да го иритираат мочниот меур, па затоа луѓето со проблеми со уринарниот систем или инконтиненција треба да избегнуваат не само свежи домати, туку и производи како што се сосови и кечап, кои можат дополнително да ги влошат симптомите.