По појавата на птичји грип, кој неодамна беше потврден кај две угинати диви птици во Скопје, Агенцијата за храна и ветеринарство (АХВ) апелира до граѓаните ако пронајдат угината дива птица од водни видови – патки, гуски и слично, да се јават на бесплатната телефонска линија или преку електронска пошта или да ги контактираат ветеринарните друштва.

-Доколку станува збор за други видови угинати птици и за изолирани угинувања, тоа треба да го пријават на јавните комунални претпријатија за нештетно отстранување на лешевите – велат од АХВ.

Од Агенцијата велат дека иако станува збор за зооноза, во вакви случаи, не претставува сериозна закана за ширење на болеста, ниту кај птиците ниту кај луѓето.

-Болеста се шири преку директен контакт со заразени птици или секрети од истите, особено фекалии. Агенцијата за храна и ветеринарство ги потсетува одгледувачите на живина дека задолжително е пријавувањето на промени во здравствената состојба и зголемена смртност на живината, до надлежен официјален ветеринар или ветеринарно друштво, како и примена на биосигурносни мерки при спроведување на сите активности на одгледувалиштето. АХВ апелира на внимателност и преземање на заштитни мерки за категориите на лица кои се изложени на ризик, односно за лицата кои можат да имаат близок контакт со заразени птици – се додава во соопштението.

Дивите птици, најчесто преселните, се резервоар и најчести преносители на вирусот на болеста птичји грип.