Македонскиот репрезентативец Езѓан Алиоски (33) кој го носеше дресот на Лугано една година и пол, би можел повторно да игра за швајцарскиот фудбалски клуб следната сезона, пренесуваат тамошните медиуми.

– Сè уште нема ништо конкретно, но тоа е можност што ја проценуваме внимателно. Странство е негов приоритет, во Швајцарија има два или три тима заинтересирани за него – вели Дино Ламберти, агентот на нашиот играч.

Ламберти е основач на агенцијата ФПА Ферплеј, компанијата која се грижи за интересите на Алиоски.

– Да, Лугано е еден од тимовите со кои преговараме во моментов. Сепак, сè уште нема ништо конкретно меѓу двете страни. Секако, враќањето во Тичино е опција што ја разгледуваме и тој нема намера да ја исклучи априори. Во контакт сме со клубот, но досега не е донесена одлука – рече Ламберти.

Иако краткотрајно, неговото искуство во Тичино остави трага. Алиоски одигра 54 натпревари за Лугано во швајцарско првенство и тамошниот Куп со учинок од 20 голови и 16 асистенции.