Груба невистина анонимно пласирана преку социјалните мрежи е завчерашниот обид на граѓаните да им се протне лагата дека е доведено во опасност нивното здравје поради наводниот нелегален увоз на 10 камиони со небезбедни домати по потекло од соседна Албанија. Според анонимниот загрижен автор на пораката, наводно станува збор на домати што како небезбедни поради утврдено зголемено присуство на тешки метали и пестициди се вратени од увоз од Босна и Херцеговина или од Република Црна Гора, тврдат од Агенција за храна и ветеринарство.

– Како одговорна институција за безбедноста на храна, уште поодговорно тврдиме дека ваков таканаречен увоз не е можен, бидејќи пратки со храна, вклучително и со домати, кои како небезбедни се вратени од увоз во други земји освен да транзитираат, не смеат да се увезат во државава – децидни се од АХВ.

„Слободен печат“ праша и во Пазарниот инспекторат, од каде што ни одговорија дека не се надлежни.

– Ние не можеме да утврдиме дали пратките се со пестициди, бидејќи, немаме таква надлежност. За тоа се надлежни или од Земјоделскиот инспекторат или од Агенција за храна и ветеринарство – велат од ДПИ.

Од АХВ наведуваат дека од почетокот на годинава од вкупно увезените 1.8 милиони килограми домати по потекло од Република Албанија нема вратено ниту една пратка како небезбедна.

-Во неделата (14 мај) преку инспекциското место на ГП Табановце, кое работи за време на викенд, инспектор за храна на Агенцијата за храна и ветеринарство изврши преглед и дозволен е увоз на 12 пратки со различен вид зеленчук, од кои 148.757 килограми домати. Увозот е реализиран од 11 оператори со храна евидентирани во Агенцијата за храна и ветеринарство, кои за увозот ја поседуваат целокупната потребна документација. Досега, вклучително и викендов, не е вратена ниту една небезбедна пратка од соседна Албанија – посочуваат од Агенцијата.

Инспекциските служби на АХВ вршат контроли на домашниот пазар, како и на пратките што се увезуваат во земјава. Со контролите се опфатени магацините за чување на овошје и зеленчук, дистрибутивните центри и преработувачките капацитети за овошје и зеленчук, како и мешовитите продавници.

Според Светска банка, Албанија е водечка земја во регионот според извозот на домати и 20 место во светот по производство и извоз на овој зеленчук, пренесува албанската новинска агенција АТА.