Аероклубот „Мирко Тодоровски“ од Битола ги покани сите кандидати за градоначалници и советници „не на дебата, туку на лет“.

Оттаму им порачаа да не зборуваат само за височини, туку и да ги почувствуваат.

„Да видиме кој има визија од друга повисока перспектива. Веќе 100 години летаме над Битола и подалеку, а сè уште чекаме некој да нè стави во програмата — не како проблем, туку како гордост на градот.

Во сабота ќе славиме еден век љубов кон небото. А за следниот век, би сакале сите што ветуваат „нови височини“ барем еднаш да погледнат нагоре“ велат до објавата од аеро-клубот.

Аероклубот „Мирко Тодоровски“, на 11 октомври, на спортскиот аеродром крај Логоварди, Битолско, ќе прослави еден век летачка традиција и ќе им оддаде почит на храбрите ентузијасти што ја иницираа авијацијата во Битола. Од аероклубот, основан во 1930/1931 година, произлегоа генерации пилоти, моделари и визионери.

„Овој јубилеј не е само потсетник на славното минато туку и ветување за иднината: нови летови, нови авантури и нови генерации што ќе продолжат да ја градат авијацијата во Битола“, велат организаторите на прославата.

Програмата ќе започне во 11 часот, со свечена академија, доделување признанија на заслужни членови и со премиера на видеозаписот „100 години аероклуб“. Денот ќе биде исполнет со летови на авиомоделарите, музички настапи и со гастрономска понуда.

„Практично, на 11 октомври, градот ќе го преселиме од Широк Сокак на саботно корзо на спортскиот аеродром, а влезот ќе биде слободен – велат организаторите.