Поранешниот капитен на Динамо Загреб и долгогодишен македонски репрезентативец, Аријан Адеми, од оваа сезона настапува за унгарскиот Ујпешт, каде брзо се наметна како стандарден играч во стартната постава.

Адеми просечно игра по 82 минути по натпревар, што е доказ за довербата што му ја укажува стручниот штаб, но и покрај добрите перформанси, статистиката открива дека во унгарското првенство не ужива ист статус како во Хрватска, каде помина речиси цела своја кариера.

Забележително е тоа што на само пет првенствени натпревари, Адеми доби дури четири жолти картони, бројка која е еднаква со онаа што ја собра за цели две сезони во дресот на Динамо, каде одигра 71 натпревар во Првата лига и Купот на Хрватска.

Адеми беше дел од загрепскиот клуб дури 14 години, период во кој освои дури 13 шампионски титули и остави длабока трага како лидер и борец на теренот.