Претседателот на Демократскиот сојуз на Косово (ЛДК), Љумир Абдиџику, по денешната средба со премиерот Албин Курти, рече дека премиерот го сменил ставот на повеќе теми поврзани со дијалогот со Србија.

„Забележав не само кога станува збор за реципроцитет, туку и други теми во кои се редизајнирани позициите на премиерот, како што се прашањето за извинувања (Србија пред продолжување на дијалогот), внатрешен дијалог (со косовските Срби) и надворешен дијалог“, Рече Абдиџику.

Лидерот на ЛДК рече дека сега е време Курти да се докаже и додаде дека ќе ја има поддршката од неговата партија сè додека таа работи добро и правилно.

На прашањето дали има разлика меѓу него и премиерот за основните прашања од дијалогот, Абдиџику рече дека немаат несогласувања затоа што се согласиле за прашањата што треба да се зачуваат.

Во соопштението од кабинетот на премиерот Курти се вели дека претседателот на ЛДК ги изразил своите ставови за дијалогот, кои исто така ги доставил во писмена форма.

Абдиџику истакна дека ЛДК ќе го поддржи дијалогот доколку се почитуваат начелата презентирани во доставениот документ и ако крајниот резултат е заемно признавање.

„Премиерот Курти и претседателот на ЛДК се согласија дискусијата за дијалог да продолжи во Собранието на Косово. Премиерот ја оцени како значајна соработката меѓу владата и опозицијата“, се вели во соопштението.

Денешната средба меѓу Курти и Абдиџику е дел од средбите што премиерот на Косово ги има со лидерите на опозициските партии со цел да соработуваат за прашања од интерес на земјата.

Курти вчера се состана со лидерот на Сојузот за иднината на Косово, Рамуш Харадинај, кој побара директно учество на претставниците на САД во дијалогот.

Вршителот на должноста претседател на Демократската партија на Косово, Енвер Хоџај, одби да се сретне со Курти и го повика премиерот да разговара за прашањата важни за Косово во Собранието на Косово.