Потпретседателот на црногорската Влада, Дритан Абазовиќ го предупреди шефот на државата, Мило Ѓукановиќ дека ќе биде сменет доколку го прекрши Уставот.

Абазовиќ, по повод враќањето на пакетот закони на повторно изјаснување во Парламентот, меѓу кои и изменетиот Закон за слобода на вероисповед, истакна дека Ѓукановиќ „себеси си дал жолт картон”.

– Со враќањето на законите на повторно гласање, Ѓукановиќ себеси си даде жолт картон. Ако го прекрши Уставот, ќе го смениме, напиша потпретседателот на црногорската Влада на Твитер.

Ѓукановиќ претходно денеска објави дека пакет закони, кои биле усвоени на последната минатогодишна седница на Парламентот, ги вратил на повторно изјаснување.

Ваквиот потег на Ѓукановиќ, за лидерите на владејачките партии, бил очекуван, имајќи предвид дека тој бил иницијатор на дискриминаторскиот закон за слобода на вероисповед, што доведе до соборување од власт на неговата ДПС.