Академија Пандев продолжува со одличните игри на почетокот од првата фудбалска лига, во дербито на колото е совладан тимот на Работнички со 1:2 во Скопје.

По четири кола, Пандевци се лидери на табелата со 10 бодови.
Струмичани поведоа уште во првата минута со голот на Сашко Пандев откако киксна голманот на „романтичарите“ Шишковски.

До крајот на полувремето, домаќините успеаја да го израмнат резултатот, Николче Шарковски со одличен удар од 30-тина метри го вртати својот тим во живот. Сепак, трите бодови за Академија Пандев ги обезбеди Крстовски на 12 минути пред крајот на натпреварот.

Екипата на Шкендија се наоѓа во голема криза, и по четири кола не знае за победа но по поразот од Борец во Велес, изненадувачки се наоѓа на дното на табелата со еден освоен бод. Победата за Борец ја обезбеди Никола Прелчец во 80 минута, откако во првиот дел, Шкендија не успеа да го реализиран пеналот.
Поразот во Велес, најверојатно ќе значи и крај за тренерот Ќатип Османи.

Македонија ЃП и Силекс им приредија вистинско гол шоу на навивачите во Кратово, постигнувајќи дури седум голови. На крајот победата им припадна на „лавовите“ кои со овој триумф дојдоа до второто место на табелата со осум бодови.

Екипата на Струга Трим Лум и Шкупи одиграа без победник (1:1) во натпревар кој го одбележаа дури три црвени картони, два за домашниот тим и еден за Шкупи.

ПФЛ, 4. Коло Резултати:
Работнички – Академија Пандев 1:2
Борец – Шкендија 1:0
Струга Трим Лум – Шкупи 1:1
Силекс – Македонија ЃП 3:4
Ренова – Вардар (утре)