Експерт за мода изјави дека појавувањето на Шон Диди Комбс на суд во џемпер е важен елемент од неговата одбрана на судењето. Додека некои обвинети се појавуваат на суд во затворска облека, на Комбс му е дадена дозвола да носи цивилна облека.

Според „Е! њуз“, му е дозволено да има пет кошули, пет пара панталони, пет пара чорапи, пет џемпери и два пара чевли, што може да ги носи за време на судењето. Многу обвинети имаат право да носат своја облека за да избегнат влијание врз поротата, бидејќи постои загриженост дека затворскиот комбинезон би можел да создаде негативна слика за обвинетиот.

Иако камерите не се дозволени во судницата, дозволени се уметници кои прават скици од судницата, а ги објави „Ројтерс“, вклучувајќи ги и оние што го прикажуваат изгледот на Комбс.

Скиците ја покажуваат косата на Диди како значително побелена, бидејќи нема пристап до боја за коса во притвор. Често е прикажан како носи комбинација од кошула и џемпер – што е во остра спротивност со облеката што обично ја носи во јавноста.

Новинар од „Индипендент“ дури го опиша како „непрепознатлив“. Според „Вашингтон пост“, трите уметници кои го скицираат судењето претходно скицирале познати обвинети како Доналд Трамп, Харви Вајнштајн, Вуди Ален, Р. Кели и Гислен Максвел.

Тие рекоа дека Комбс има „не многу добро лице за цртање“ бидејќи „нема многу дефинирани црти на лицето“, но има „многу експресивни веѓи“. Наводно, нему воопшто не му се допаднале самите скици – мислел дека го прават да изгледа „како коала“, пренесува „Law&Crime Network“.

Комбс често се гледа како носи џемпер во скиците, а главната модна критичарка на „Њујорк тајмс“, Ванеса Фридман, верува дека ова не е случајност. Таа објаснува дека Комбс „воопшто не личи на Шон Комбс чие однесување се доведува во прашање на суд“ и го споменува она што го нарекува „одбрана на штребер“.

Тоа е термин измислен од адвокатот Харви Словис во 1999 година, кога Комбс беше на судење за поседување оружје – тогаш му беа ставени очила за да изгледа попаметен и помалку заканувачки пред порота. Фридман сугерира дека неговата одбрана сега ја користи „одбраната со џемпер“ – односно, со тоа тие се обидуваат да прикажат слика за личноста на Комбс што ќе се разликува од онаа прикажана со обвиненијата за рекетирање, трговија со луѓе и проституција.

Додека поротата ги слуша обвиненијата, Фридман вели дека „самите џемпери сведочат во негова корист“.

Американскиот федерален судија Арун Субраманијан ѝ рече на поротата дека судењето може да трае околу осум недели. Започна на 12 мај и моментално е во својата петта недела. Досега се испитани бројни сведоци, а исходот ќе зависи од тоа колку време ќе ѝ биде потребно на поротата да донесе пресуда.