Американската актерка Зои Кравиц откри дека престојувала во куќата на пејачката Тејлор Свифт во Беверли Хилс кога пожарите го зафатија Лос Анџелес претходно годинава. Светската ѕвезда ја примила актерката и нејзината мајка, Лиса Боне, во својата вила вредна 25 милиони долари, каде што останале две недели.

„Тејлор има прекрасна куќа од 30-тите години – нешто што сакате да го зачувате и за кое сакате да се грижите“, изјави Кравиц во една телевизиска емисија. Таа откри дека секогаш се труди да биде добра гостинка и да го остави просторот „подобар отколку што го затекнала“, но овојпат ненамерно оштетила дел од скапоцениот дом на пејачката.

Инцидентот се случил при обидот да ја исчистат куќата пред да заминат. Лиса Боне со себе ја понела својата змија по име Орфеус, која во еден момент избегала. Кравиц ја затекнала мајка ѝ како клечи во аголот на бањата на горниот кат, а потоа дознала дека змијата влегла во мала дупка до вградената клупа во ѕидот.

Мајката и ќерката се обиделе да ја извлечат змијата, но кога Боне ја фатила за опашот, таа се вовлекла уште подлабоко во ѕидот. На крај, Кравиц морала да го повика управителот на куќата, кој пристигнал со лост и започнал да ги вади плочките и да го оштетува ѕидот.

„Целосно ја уништивме бањата на Тејлор. Во еден момент помислив: ‘Или ќе ѝ ја срушиме бањата, или ќе морам да ѝ кажам дека има змија некаде во куќата‘“, изјави актерката.

Таа го замолила управителот да не ѝ кажува ништо на пејачката додека не ги санираат штетите.

Сепак, Кравиц решила да ѝ се јави на својата долгогодишна пријателка и да ѝ признае. Но, Свифт веќе била запознаена со настанот.

„Ја повикав и ѝ реков: ‘Сакам да разговараме за нешто‘. Таа ми одговори: ‘За тоа како речиси ја изгуби змијата во мојата куќа и ми ја уништи бањата?‘“, се присети таа.

Двете се пријателки повеќе од десет години, а во последно време особено се зближиле. Оваа година неколкупати биле видени заедно во јавноста, а се дружеле и по раскинувањето на свршувачката на Кравиц со актерот Ченинг Татум. Таа присуствуваше и на концерт на Свифт во Лондон, кој го опишала како „лудо искуство“.

„Не сум изненадена – Тејлор е неверојатно талентирана во сè што прави. Но, фасцинантно е тоа што по настап пред илјадници луѓе, едноставно ќе дојде, ќе пиеме вино, ќе јадеме хамбургер и ќе се дружиме“, рече Кравиц.