Владејачката партија „За наша Македонија“ (ЗНАМ) одржа прес-конференција на која беа соопштени одлуките на Извршниот и на Централниот одбор во врска со претстојните локални избори.

„Движењето ЗНАМ за Наша Македонија ќе настапи самостојно на претстојните локални избори со свои листи за советници во повеќе од 50 општини. Централниот одбор ја усвои одлуката за взаемна соработка и поддршка со ВМРО-ДПМНЕ во делот на кандидатите за градоначалници. Оваа одлука значи дека ВМРО ДПМНЕ ќе ги поддржи кандидатите на ЗНАМ и во тие општини нема да имаат свој кандидат за градоначалник, а од друга страна Движењето ЗНАМ ќе ги поддржи кандидатите за градоначалници на ВМРО ДПМНЕ во сите општини, вклучувајќи го и градот Скопје, каде што ЗНАМ нема да има свој кандидат за градоначалник“, рече портпаролот на ЗНАМ, Никола Мемов.

„За кандидат за градоначалник на Општина Куманово едногласно е избран Максим Димитриевски, актуелен градоначалник на општина Куманово. За кандидат за градоначалник на Општина Центар едногласно е избран Мирослав Лабудовиќ, претседател на Градската организација на Движењето ЗНАМ во Скопје и актуелен заменик-министер за енергетика, рударство и минерални суровини“, додаде тој.