За само 15 месеци од своето формирање, Движењето ЗНАМ за Наша Македонија се претставува како сериозна политичка сила, а не како привремен проект на политичката сцена. На Конвенцијата што се одржа во Македонската филхармонија, лидерот Максим Димитриевски истакна дека ЗНАМ настапува со концепт, визија и идеи насочени кон чесно и одговорно управување со државата и општините.

„Никогаш нема да се откажеме од Куманово, ниту од Центар, ниту од кое било друго место во Македонија. Нашата борба е за подобро и праведно општество,“ порача Димитриевски, најавувајќи силно присуство на ЗНАМ во сите 53 општини и во Град Скопје.

Кандидатот за градоначалник на Центар, Мирослав Лабудовиќ, порача дека влегува во трката поради вербата дека ЗНАМ може да донесе промена. „

Доста е од хаосот во Центар – време е за ново лице, почисто, побезбедно и поуредено,“ изјави тој.

Со порака за враќање на достоинството на главниот град се обрати и генерал Горанчо Котевски, носител на советничката листа за Град Скопје.

„Скопје е во катастрофална состојба поради лошо управување. Подготвени сме да ја преземеме одговорноста за поурбанизирано и поорганизирано Скопје,“ нагласи Котевски.

ЗНАМ за првпат настапува самостојно на локални избори, со листи за советници во повеќе од 50 општини, но и со заемна поддршка со ВМРО-ДПМНЕ за градоначалничките позиции во Куманово и во Центар.