Александар Ѓорчевски, таткото на убиената Вања Ѓорчевска денеска одговара на прашања на Обвинителството. Уште еднаш повтори дека не ги познава другите осомничени, само слушнал за Љупчо Палевски, за кого се зборувало во соседството кога ја градел зградата „Тифани“.

На прашањето од која дрога бил зависник во периодот од 1993 до 1995 година, тој одговори дека се работи за хероин, но дека ја земал назално, а не со шприц. „Не бев екстремен зависник“, рече тој.

Од него беше побарано да ја образложи одлуката да не работи 7-8 години и да ги чува децата, на што тој одговори дека така се договориле со неговата поранешна сопруга.

„Зорица имаше срцева мана, и јас од самиот почеток ги презедов сите обврски кон децата и семејствата, како за моето така и за на Зорица, и за да ѝ олесниме, дури во еден момент дадов целосно отказ, во моментот кога бев вработен во Кометал. За тој отказ мислев дека ќе биде од краток временски период додека се стабилизираме. Меѓутоа многу набрзо дојде Миња, имаше само 1 година и 4 месеци помеѓу девојчињата, обврските се дуплираа така што се продолжи мојот рок кога бев невработен. Од 2010 до 2017 година“, објасни Ѓорчевски.

Иако децата можеле да одат во градинка или за нив да се грижат двете баби, според Обвинителството тој одлучил да не работи и да ги чува, а при тоа да нема никаков финансиски придонес во семејството кое требало да се издржува само од платата на неговата сопруга.

Тој го негираше тоа, посочувајќи дека живееле од неговата заштеда.

„Не е така, додека Зорица беше бремена, немаше приходи, живеевме од мојата заштеда. Имавме пари од свадбата, имав поддршка од татко ми, а што се однесува до тоа со бабите, мајка ѝ на Зорица инсистираше да земеме жена, а таа и мајка ми воопшто да не се мешаат во воспитувањето на децата. Имавме неуспешен обид, земавме жена додека беа уште малечки, во детали ја фативме како на Миња ѝ дава некакви средства за спиење за да седи мирна, од тие причини не се осмеливме да побараме друга жена, во градинка се обидовме, ги запишавме, и двете, една недела одеа во градинка и потоа две недели беа дома“, одоговори тој и додаде дека не знаел колку време ќе трае неговото отсуство од работа.

„Се надевавме дека што побрзо ќе се вратам на работа, во секој момент можев да се вратам на работа и ми беа отворени вратите на две фирми“, рече Ѓорчевски.

Тој беше прашан каков ученик бил во основно, а обвинителката додаде дека не бил добар ученик.

„Јас до петто одделение учев заедно со Радмила Шекеринска. Бевме двајцата првенци на генерација. На мене и на Радмила мислам дека дури сакаа и мозоците да ни ги сецираат за да видат што има внатре. Потоа дојде тинејџерски период, татко ми заминуваше на привремена работа во Полска. Тоа придонесе кај мене да се јави револт, а сите мои другарчиња, особено машките, попуштивме со учењето“, рече Ѓорчевски.

По ова прашање од обвинителката, судијата Ивица Стефановски ја опомена да прашува конкретно, а таа рече дека сака да го дисквалификува сведокот.

Беа читани пораките што тој им ги пратил на ќерките пред кобното утро, во нив им напишал да се облечат убаво зошто надвор е студено. На прашањето зошто не ги однел со кола, бидејќи и така бил слободен, тој одговори дека Зорица (мајката) не сакала да ги разгалуваат.

Обвинителството оцени дека иако важел за човек кој доцнел, тој ден кога му се јавила поранешната сопруга дека Вања ја нема, многу брзо се подготвил и веднаш излегол. Тој одговори дека бил во кревет кога му се јавила и дека ја ставил на „спикер“ и веднаш почнал да се облекува.

Обвинителката рече дека Вања во петок без исклучок секогаш одела сама, бидејќи на Миња наставата ѝ започнувала од вториот час, а таткото го потврди тоа. Така било и во петокот, кога бил првиот обид за грабнување.

„Во неделата, 26.11.2023 година, ден пред грабнувањето, знаете дека и во понеделник Вања ќе оди сама, бидејќи Миња ќе нема прв час. Дали го знаевте тоа?“, праша обвинителката.

Тој одговори дека знаел.

„И неделата претходно Миња ги губеше часовите со класната. Требаше да се врати во понеделникот, но повторно сте добиле информација дека и во понеделник нема да дојде?“, праша обвинителката, на што таткото одговори потврдно.

„Од сите обвинети од тука, само вие знаете дека Вања на 27.11.2023 година ќе оди сама на училиште“, рече обвинителката.

„Да јас знаев, а не знам што знаеле другите обвинети“, рече Ѓорчевски.