Најпознатиот француски актер на денешницата – Жерар Депардје е под притисок поради новиот телевизиски документарец, во кој е прикажан како изговара непристојни коментари за жените.

Документарецот, емитуван во четвртокот, ја прикажува 74-годишната ѕвезда како личност опседната со секс на снимањето во Северна Кореја, за време на патувањето на актерот во земјата во 2018 година.

Во видеото, кое очигледно е снимено за време на снимањето на документарецот, актерот постојано ја засрамува својата преведувачка со коментари од типот: „Тежам 124 килограми. Без ерекција. Со ерекција имам 126 килограми“. Во друга прилика пред неа вели: „Имам греда во гаќите“.

Исто така, актерот може да се види и во штала со јавачки коњи, каде коментира со сексуални алузии, велејќи дека жените уживаат во јавањето.

Во програмата, која е дел од серијалот „Понатамошна истрага“ („Complément d’Enquête“), се користи материјал за поддршка на обвинувањата за сексуалното злоставување на Депардје што неодамна ги упатија голем број жени во филмската индустрија, јавува „Би-би-си“.

Против Депардје беше покрената судска истрага под сомнение за силување и сексуален напад во 2020 година, откако тој беше пријавен од актерката Шарлот Арнолд.

Проблематично детство

Тој ги негира обвинувањата и тврди дека нивниот сексуален контакт бил консензуален. Полицијата првично го отфрли обвинението поради недостиг на докази за силување, но повторно беше отворено по жалбата, при што Арнолд тврдеше дека таа била под негова емоционална „контрола“.

Вториот случај беше покренат пред три месеци, кога актерката Хелен Дарас го обвини Депардје дека несоодветно ја допирал во 2007 година, на сетот на филмот „Диско“ („Disco“). Обвинителите рекоа дека случајот може да биде отфрлен бидејќи поминало премногу време од инцидентот.

Во телевизискиот документарец емитуван во четвртокот, и други жени зборуваа за сексуализираната атмосфера секогаш кога Депардје бил на снимање и дека биле жртви на неговите алузии. Тие рекоа дека поради неговиот статус преовладувал своевиден молк.

Роден во францускиот град Шатору, во 1948 година, Депардје имал проблематично детство пред да дојде во Париз и да биде откриен како млад и и талентиран актер во раните седумдесетти години на минатиот век. Оттогаш тој сними повеќе од 200 филмови и важи за најгледан актер во француските кина, покрај Луј де Фунес.

Новиот документарец, исто така, го истражува тврдењето дека како момче од само девет години учествувал во „силувања“ во Шатору. Депардје првпат го кажа тврдењето во интервју во 1978 година, а потоа го повтори за магазинот „Тајм“ во 1991 година кога беше во трката за Оскар за неговиот филм „Сирано де Бержерак“ („Cyrano de Bergerac“) (1990). Во Франција тогаш беше објавено дека тоа интервју помогнало оскаровското жири да се сврти против него и тој останал без престижната статуетка.

„Јас сум провокативен, но не сум силувач или предатор“

Двајца пријатели на Депардје од детството потврдија дека во педесеттите години го сметале за млад хулиган и дека во тоа време сексот без согласност бил вообичаен.

„Тој раскажа толку многу приказни. Тој изгради легенда, или можеби ние го направивме тоа за него, што го направи многу поголем деликвент отколку што всушност беше“, рече братот на Депардје, Ален.

Феминистките го имаат Депардје „на нишан“ веќе неколку години, уште откако започна движењето „MeToo“. Во април, „Медиапарт“ наведе 13 жени, некои анонимно, кои го обвинија за несоодветно однесување. Исто така, активистите го принудија да откаже некои јавни настапи.

Во октомври, пак, Депардје реагираше со отворено писмо во весникот „Фигаро“.

„Цел живот бев провокативен. Претерував. Понекогаш бев и груб. Често го правев она што другите не се осмелуваа да го направат – ги тестирав границите, ја разнишав прифатената мудрост… Но, јас не сум силувач или предатор“, напиша тој.

„Не можете да ги гледате овие интервјуа без да чувствувате длабока непријатност и емпатија кон луѓето што зборуваат… Но, она што е прикажано е само една страна“, изјави поранешниот агент на актерот, Жан-Луј Ливи.